الاعتمادات المستنديه

[الفاتح]

انا : الفاتح

الحمد لله على نعمتى العقل و العلم ,,

اخونا الاعزاء قبل ما اتكلم فى موضوع المحاضره اليوم عاوز اقول ان نيتى خالصه لوجه الله ولا اريد بهذه المحاضرات ولا شهره ولا جاه ولا مال ولكن اريد الثواب من عند الله ..

و لما بتكلم مع حد او برد بيكون كلامى معظمه هزار وانا بطبيعتى رجل مهراج لان الدنيا بسيطه اوى و مش مستاهله كلاكيع و عقد و نفسنه ... اما الناس المنفسنه اللى بتقفش على .. انا مش هرد عليهم خالص واللى مش عاوز يقر مواضيعى هوا حر ... بس انا اتمنى ان الكل يقرا و يشارك لانى باخد عليه ثواب من ربى عز وجل . ادعو الله بالخير لنا جميعا.

كفايه رغى كده و تعالى ندخل فى المحاضره مباشره :: الاعتمـــادات المستنـــدية ,,,

تعريف بسيط : يعنى ايه الاعتماد المستندى ؟؟؟؟ وببساطه و فتح مخك معايا يا مخيمرر ررر

الاعتماد المستندى عباره عن قيام المستورد بطلب فتح اعتماد من البنك لاستيراد بضاعه من الخارج ,, يعنى البنك وسيط اهو ... وده بيحصل لان المستورد لما بيسافر وبيروح مصنع معين ويختار بضائع ب 2 مليون دولار مثلا مبيكنش معاه السيوله دى كما ان المصنع لا يضمنه اصلا علشان يشحن له البضاعه وبنا عليه هوا بيختار البضاعه وبيعمل الاعتماد ده من البنك يبعته ليهم وهما يبعته البضاعه وكله بيبقى فى التماموز . و ده باختصار شديد ,,,
فى حاجه كمان .. انا معرفش المصنع ده ولا اضمنه بقرش .. يعنى ممكن انا ابعت له الاعتماد و هو مش يبعت لى الفلوس .. اعمل انا ايه بقا ؟؟؟
البنك بتاعى بيبعت الاعتماد ده على بنك المورد و الفلوس بتكون موجوده بس مش بياخدها غير لما بيقدم مستندات الشحن و الفواتير و كده ..
كده يبقى المصنع اخد الفلوس من البنك بتاعه و انا اخدت البضاعه و كله متسنجف ...
والبنك هنا وسيط وبياخداتعاب فى صوره عموله ومصاريف من المستورد و من المورد وانا كمستورد بفتح حساب وسيط بسميه ح / الاعتمادات المستنديه وافضل اعلى عليه اى مصاريف لح ما البضاعه تدخل فى المخازن بتاعتى ساعتها بس بسجلها مشتريات او مخزون حسب طريق الجرد بتاعتى.

يعنى كده فى كام طرف فى العمليه دى ؟؟؟؟ 4 فقط لا غير ..,,

انا : المستورد - بنك المستورد : بتاعى اللى بفتح منه الاعتماد - المورد : المصنع مثلا اللى انا اشتريت منه البضائع - بنك المورد : اللى ببعت عليه الاعتماد باسم المورد ...

كما ان فى حالات البنك هوا اللى بيمول العمليه كلها وبعد ما البضاعه بتوصل العميل بيدفع المبلغ على عده دفعات وده بيبقى تمويل وقصه تانيه بس هنشوفها برضو لانها حلوه ومهمه ,, بس خلونا نبدا بالاعتماد المستندى العادى .
فى نوعين من الاعتماد فيما يتعلق بالشحن :
الاول ان تسلم البضاعه فى الميناء بتاعتى وده بيبقى داخل فيها التامين والشحن وخلافه ولو البضاعه لم تصل بيبعتو تانى على حسابهم لانى متفق على التسليم محل المشترى يعنى عندى فى بلدى . Cost – insurance – fright ( cif )
التانى ان تسلم البضاعه هناك وعلى ظهر المركب زى التسليم مح ل المشترى , يعنى هوا غير مسؤل عنها تماما ولو ولعت ولا حصل اى حاجه هوا خالى المسؤليه ودى ارخص بس اكثر خطر . Fright on board ( fob )

مثال الحاج سيد الرخم نزل الصين استورد شويه اكسسوارات ب 10000 دولار وجاب فاتوره بيانها كالتالى :
م بيان الصنف كميه سعر قيمه
1 أ 1000 3 $ 3000 $
2 ب 2000 2 $ 4000 $
3 ج 2000 1.5 $ 3000 $
الاجمالى 10000 $

كما ان البنك بياخد عموله= 2500 ج مصاريف الاعتماد و م تخليص جمركى = 8000 ج وهى كامل مصاريف التخليص والارضيات والشحن والتفريغ وخلافه . كما ان اتعاب المخلص واكراميات اخرى = 3000 ج وفى مصاريف نقل داخلى = 500 ج اما قيمه الجمارك اصلا = 10000 ج وضريبه الارباح التجاريه والصناعيه 1 % وضريبه المبيعات = 10 % وبس كده .
المطلوب حساب قيمه البضاعه ومعامل الدولار وعمل قيود اليوميه الازمه علما بان سعر الدولار = 5 ج .
أ – ضريبه المبيعات = (10000 × 5 +10000) × 10% = 6000 ج
ب – ض أ ت = ( 50000 × 5 + 10000 ) × 1% = 600 ج
ج – تكلفه البضاعه =
قيمه البضاعه 50000
جمارك 10000
تخليص جمركى وارضيات 8000
اتعاب المخلص 3000
م بنك 2500
م شحن 500
الاجمالى 74000

لاحظ عدم وجود ض م ( ضريبه مبيعات ) ولا ض ا ت ( ضريبه ارباح تجاريه ) ضمن تكلفه الرساله .
لاحظ ان ض ممكن تكون 7 % او 10 او 15 % حسب نوع البضائه المستورده .
د – قيود الاثبات : زى ما قلنا بنوسط حساب الاعتماد المستندى وفى الاخر بعد ما نحمل عليه كل تكاليف الرساله بنقفله فى ح البضاعه او المشتريات .
1 – اول حاجه بندخل قيمه الفاتوره
50000
50000 من ح / الاعتماد المستندى
الى ح البنك او تسهيلات موردين اثبات قيمه البضاعه ودفعها منا لبنك

2 – الجمارك : بنحملها على الاعتماد
10000
10000 من ح / اعتماد مستندى
الى ح / الخزينه ادخال الجمارك فى ح الاعتماد

3 – الضرايب
6600 من ح / الاعتماد المستندى
الى مذكورين
6000 ح/ض م
600 ح/ض ا ت حملنا الضرايب على الرساله او الاعتماد


4– بندخل باقى عناصر التكلفه من اتعاب وعمولات و......

14000 من ح / الاعتماد المستندى
الى مذكورين
8000 ح/ تخليص جمركى
3000 ح/اتعاب المخلص
500 ح/م شحن
2500 ح / م بنك اثبات كل المصاريف على الاعتماد علشان نحملها فى الخطوه الجايه على الرساله او تكلفه البضاعه .
5 – بعد الانتهاء من كل الخطوات ودخلنا البضاعه المستودع نقفل ح الاعتماد ده خالص فى ح / المشتريــــــــات

74000 من ح / المشتريات او المخزون
74000 الى ح / الاعتماد المستندى - نقفل الحساب زى ما قلنا فى المشتريات او المخزون وبكده نكون عملنا كل خطوات الاعتماد

حته بقه مهمه جدااااا و خلى بالك و ركز فيها اللى هيا بتاع معامل الدولار ... يعنى البضاعه دى جايه بالدولار و انا فاتح الاعتماد بالدولار و فى مصاريف تانى بالجنيه و بلابلابلا و حاجات غريبه كده متداخله ... ازاى احسب السعر بقا للبضاعه كلها بالجنيه ؟؟؟!!! اتفضلو معانا نشوف
معامل الدولار : هو معامل تحويل الرساله كلها من الدولار للجنيه بس بعد تحميل كل التكاليف على الرساله علشان نعرف قيمه كل صنف على حده بالجنيه .
= اجمالى ت الرساله بالجنيه ÷ القيمه بالدولار = 74000 ÷ 10000 = 7.4 دولار / جنيه
يعنى انا كل تكاليف الرساله دى اد ايه ؟؟؟ و اجمالى التكاليف دى احنا شناها من شويه اللى هيا السعر للبضاعه بالجنيه و السحن و الجمارك وبلابلابلا بس مش داخل فيها ضريبه المبيعات لانها ضريبه انا مش بتحملها اصلا و بتحمل على المستهلك النهائى ... و بعدين انا بقسمها على سعر الفاتوره بالدولار ... زى ما هنشوف كده

م بيان الصنف المعامل كميه سعر قيمه
1 أ 7.4 1000 3 $ 1000 ×3×7.4 = 22200
2 ب 7.4 2000 2$ 2000×2×7.4 = 29600
3 ج 7.4 2000 1.5 $ 2000×1.5 ×7.4 =22200
الاجمالى 74000 جنيه

كده انا عرفت ان اجمالى تكلفه البضاعه كام و عرفت سعر الوحده كام برضو و اعرف احط عليها هامش الربح وبلابلابلابلا ,,,,

اعتقد ان ده كفايه علشان تعرف الاصل بتاع الاعتماد المستندى ... و خلى بالك ان الكلام ده ثابت فى كل حاجه بس مع تعديلات بسيطه اوى اوى اوى ...

حاجه هامه .. انا فى مصر اشتغلت اعتمادات بفضل الله بس لما جيت المملكه هنا لاقيت فى طريقه جديده على تماما لا يوجد فيها بنوك ولا غيرو .... و الطريقه دى كالتالى :

المستورد راح الصين برضو و لف على المصانع و عمل اوامر الشراء اللى هوا عاوزها و كله تمام ..
حول ل مكتب تخليص اسمه الشافعى فى الصين المبلغ كامل ..
الشافعى استلم البضاعه من المصنع و سدد حسابها و قام بشحنها لينا و اخد عمولته ..
احنا بعتنا مخلص جمركى و خلص لنا البضاعه و شحنها لينا .

الحكايه دى اقل تكلفه جدااااااااااااااااا بس لازم يكون فى ثقه فى التعامل مع الشافعى ده ويكون عارفه و محل ثقه وانا اكتشفت انه فعلا فى ناس كتير اوى بتعتمد على المكتب ده و حاجات كده ,, و الشاهد من الحكايه دى ان مش كل اللى انت عارفه هوا بس الصح .. بالعكس فى حاجات تانى معروفه و عادى جداااااا و كلها صح ...
والشاهد التانى من الحوار ده انك كل ما تعيش هتتعلم وتشوف حاجات كتير اوى اوى اوى .

وقل ربى زدنى علما

اتمنى انى اكون قلت حاجه عليها القيمه و اى حد عنده اى استفهام او استفسار او مش مقتنع بالحوار ده بليز يقولو وانا اقولو و نفضل نقول لبعض ..... :d

رافى

ساعد في نشر والارتقاء بنا عبر مشاركة رأيك في الفيس بوك